कार्यालय आउजाउमै सकिन्छ चार घण्टा, त्यही पनि फेरि वडाध्यक्ष लड्दै हिमबहादुर

पोखरा, १५ वैशाख ।

गाउँगाउँमा चुनावी माहोल तातेको छ । अन्नपूर्ण आधार शिविर (एबिसी)को प्रवेश द्वार छोम्रोङमा पनि उम्मेद्वारी दर्तासँगै चुनावी माहोल गर्मिएको छ । गुरुङ समुदायको बाक्लो वस्ती भएको छोम्रोङ कास्कीको अन्नपूर्ण गाउँपालिका ११ मा पर्छ । यही गाउँका ५९ वर्षीय हिमबहादुर गुरुङ चुनावी प्रचारप्रसारमा जुटेकाले गाउँमा चुनावी माहोल अरु गाउँभन्दा फरक छ । दोस्रो कार्यकालका लागि पनि उनले नेकपा (एमाले)बाट उम्मेद्वारी दर्ता गराएका छन् ।

२०७४ सालको निर्वाचनमा हिमबहादुर एक सय २० मतान्तरले विजयी भएका थिए । हिमबहादुरले पाँच सय ३० मत ल्याउँदा उनका प्रतिस्पर्धी नेपाली कांग्रेसका भूवनेश्वर गुरुङले चार सय १० मत पाएका थिए । २०६१ सालदेखि २०६८ सम्म छोम्रोङ पर्यटन व्यवस्थापन समितिको चार कार्यकाल अध्यक्ष भए । जनतामाझ परिचित भएको र काम गर्ने स्वभाव भएकाले उनले २०७४ सालमा एमालेबाट टिकट पाएका थिए ।

पछिल्लो कार्यकालमा उनले घरघरमै सामाजिक सुरक्षा भत्ता पुग्ने वातावरण बनाए । ‘हाम्रोमा बैंकको सुविधा लिन गाह्रो छ । वृद्धभत्ता लिन सबै बुढाबुढी जान सक्ने अवस्था छैन । मेरो कार्यकालमा टोलटोलमा बैंकको कर्मचारी पु¥याएर भत्ता वितरण गरेँ । धेरै बा–आमालाई सहज भयो,’ हिमबहादुरले सुनाए, ‘अपांगता भएकालाई पनि टोलमै लगेर भत्ता दिने व्यवस्था गरेँ ।’

वडा नम्बर ११ पर्यटकीय गतिविधि निकै चलायमान हुने वडा हो । त्यसैले आफ्नो चासो नै पर्यटन विकास भएको हिम सुनाउँछन् । ‘हाम्रो पदमार्ग पर्यटन राम्रो छ । पछिल्लो कार्यकालमा आधार शिविर पुग्ने बाटो स्तरोन्नति, ठाउँठाउँमा पुल बनाउने काम गरेँ । पर्यटकलाई कसरी अझ एसिबी आउने वातावरण बनाउने भन्ने मेरो जोड रहन्छ,’ उनले सुनाए ।

पछिल्लो पाँच वर्षे कार्यकालमा वडाका खोलामाथि झोलुंगे पुल बनाउने, सिँचाइ योजना, पदमार्ग स्तरोन्नतिलगायत काममा बजेट छुट्याउन प्रदेश र संघसम्म पहुँच पु¥याए । पाँच वर्षमा गाउँपालिका, प्रदेश र संघ सरकारबाट ३१ करोड ३४ लाख रुपैयाँ बजेट वडाले पाएको उनले बताए । कुल बजेटमध्ये गाउँपालिकाबाहेक प्रदेश सरकारको २० करोड ३१ लाख पचास हजार र संघ सरकारबाट ६ करोड ६५ लाख रुपैयाँ वडामा परेको हो । पुल, सडक, पदमार्ग, खेलमैदान, भवन निर्माणमा बजेट खर्च भएको हिमबहादुरले सुनाए ।

हिमबहादुरको गाउँ छोम्रोङ र पहिला वडा कार्यालय भएको घान्द्रुक गाउँ वारिपारिको डाँडामा पर्छ । सडक नहुँदा हिँडेर आउजाउ गर्न आठ घण्टा खर्चिनुपथ्र्यो । अहिले कार्यालय सारेपछि चार घण्टा समय छोटिएको छ । फेरि उनी हिँडाइका दुःख सहने अठोटसहित वडाध्यक्षमा उठेका छन् ।

पछिल्लो निर्वाचनमा उनले कांग्रेसको गढ भत्काएर चुनाव जिते । यसपटक गठबन्धनविरुद्ध लड्नुपर्ने भएकाले पनि पार्टीले उनैलाई उठाएको छ । ३ हजार जनसंख्या रहेको अन्नपूर्ण ११ मा १९ सय मतदाता छन् । ‘मैले गरेको काम देखेर पार्टीले पनि पत्यायो । घरमै बस्नुभन्दा एकपटक फेरि लडौं भन्ने भयो । हिँड्न सक्ने भएपछि ओहोरदोहोर गाह्रो छैन,’ हिमबहादुरले फेरि चुनाव लड्नुको कारण सुनाए, ‘यो कार्यकाल कोभिड, सरकार परिवर्तनले गर्दा गर्छु भनेका कति काम गर्न सकिनँ । जितेँ भने पछिल्लो कार्यकालका थाँती काम सक्छु ।’

तत्कालीन घान्द्रुक गाविसमा ९ वटा वडा थिए । ती वडा अन्नपूर्ण गाउँपालिकाको वडा नम्बर १० र ११ मा गाभियो । त्यसैले यी दुई वडाको भूगोल ठूलो छ । वडा कार्यालय पर्यटकीय गाउँ घान्द्रुकमा थियो । वडाको बीच भागमा पर्ने उरीमा स्थानीयको घर भाडामा लिएर वडा कार्यालय चलाइएको छ । वडाको आफ्नो भवन निर्माणाधीन छ । वडाका गुर्जुङ, मेलाँचेजस्ता गाउँलाई सडक सुविधाले कार्यालयबाट सेवा लिन सहज भएको छ ।