पोखरा, ०५ वैशाख ।
नेपाल सुशासन पार्टीका केन्द्रिय अध्यक्ष रमेश प्रसाद खरेलले पोखरामा निर्माणाधिन पोखरा अन्तराष्ट्रिय विमानस्थलमा १४ अर्व घोटला भएको दावि गरेका छन् । पोखरामा आयोजित आमसभालाई सम्बोधन गर्दै अध्यक्ष खरेलले ९ अर्वमा निर्माण सम्पन्न हुने विमानस्थलको लागत २३ अर्व पुर्याएर लोभिपापीहरुले १४ अर्व बाँडेर खाएको जिकिर गरे । यस्ता प्रकारका आर्थिक अनियमितताहरु दर्जनौ आयोजनाहरुमा भैरहेको उनले बताए ।
मुलुकमा अहिले मानव र दानव तथा सत्य र असत्यको बिचमा लडाँई जारी रहेको बताए । अध्यक्ष खरेलले मुलुकलाई व्यक्तिगत स्वार्थ र कुशासनले खोक्रो बनाएको बताए । पुर्व डिआईजी समेत रहेका अध्यक्ष खरेलले यो देश क्रमश चोर, पकेटमार र संगठित डाकाहरुको पञ्जामा पुगेको बताए । यसबाट उन्मुक्तिका लागि नेपाल सुशासन पार्टी वैकल्पिक शक्तिका रुपमा आएको अध्यक्ष खरेलले बताए । आगामी निर्वाचनमा देश लुट्ने संगठित अपराधिहरुलाई मत नदिन अध्यक्ष खरेलले अपिल समेत गरे ।
नयाँ पुस्ताको भविष्य उज्जवल बनाउनका साथै देश बचाउनका लागि आफुहरु अहोरात्र खटिने अध्यक्ष खरेलले विश्वास दिलाए । मुलुकमा जनताको सरकार नभएको उनले टिप्पणी समेत गरे । मुलुक दुखमा परेको बेला मनलाग्दी लुट्ने लुटेराहरुले देशलाई र्बबादी तर्फ धकेलिरहेको उनले आरोप लगाए । मुलुकको अर्थतन्त्र इतिहास कै कमजोर अवस्थामा पुगेको बताउदै उनले यसका कारण राष्ट्रिय अस्तित्व नै संकटमा परेको उल्लेख गरे ।
कार्यक्रममा नेपाल सुशासन पार्टीका उपाध्यक्ष गोविन्दराज पोखरेलले वैकल्पिक राजनीतिका लागि आफुहरु मैदानमा उत्रिएको बताए । नेपाल सुशासन पार्टीका महासचिव गोविन्द गिरीले परिवर्तनका लागि मन र मत दुवै परिवर्तन आवश्यक रहेको बताए । पार्टीका केन्द्रिय सदस्य भुवन लामिछानेले राजनीतिक कुशासनका कारण नागरिक भएपनि अनागरिक जस्तो गरि बाँच्नु परेको बताए । अर्का केन्द्रिय सदस्य शम्भु सुस्केराले विवेकको मत विवेकपुर्ण ढंगले प्रदान गर्न आग्रह गरे । पार्टीका गोरखा जिल्ला अध्यक्ष टोप गुरुङ्ले पुराना भनिएका पार्टीहरुले देशलाई कंगाल बनाएको आरोप लगाउदै सुशासनका लागि आफ्नो पार्टीलाई रोज्न अपिल गरे ।
पार्टीका कास्की जिल्ला अध्यक्ष श्रीकृष्ण भुजेलको अध्यक्षतामा सम्पन्न कार्यक्रमको संचालन तथा सहजिकरण संचारकर्मी मधु अधिकारीले गरेका थिए । पार्टी आगामी निर्वाचनका लागि आयोगले मकैको घोगा चुनाव चिन्ह प्रदान गरेको छ ।
प्रतिक्रिया लेख्नुहोस्:-