पोखरा, १७ फागुन ।
पर्यटन व्यवसायी महिला संघ(टेवान)ले आफ्नौ चौथो वार्षिक साधारणसभा एक कार्यक्रमकाबीच सम्पन्न गरेको छ । साधारणसभाको सोमबार गण्डकी प्रदेशका पर्यटन, उद्योग, वाणिज्य तथा आपूर्ति मन्त्री मणिभद्र शर्मा कंडेल उद्घाटन गर्नुभयो । साधारणसभाको उद्घाटन गर्दै उहाँले कोरोना प्रभावित पर्यटनको पुर्नरुत्थान सरकारको प्राथमिकतामा रहेको बताउनुभएको छ ।
कोरोनाले पर्यटन व्यवसाय नराम्रोसँग प्रभावित भएको र यसको पुर्नरुत्थानमा लागि सरकारले सरकारले विभिन्न कार्यक्रम अघि सारेको उहाँले बताउनुभयो । कोरोना प्रभावित व्यवसायलाई राहत उपलब्ध गराउने उद्देश्यका साथ व्यवसाय जीवन रक्षा कोष, कर्मचारी पर्यटन विदा, पर्यटन मजदुर लक्षित राहत कार्यक्रम आदि अघि सारिएको उहाँले जानकारी गराउनुभयो ।
टेवानले महिला पर्यटन व्यवसायीलाई संगठित गर्दै विभिन्न कार्यक्रम अघि बढाएकोमा प्रशंशा गर्दै उहाँले मन्त्रालयका तर्फबाट क्षमता अभिबृद्धिका लागि सहयोग गर्ने प्रतिवद्धता व्यक्त गर्नुभयो ।
टेवानका अध्यक्ष रेनु थापाले दीगो पर्यटनका लागि समान सहभागिता भन्ने नाराका साथ संस्था विभिन्न कार्यक्रम सहित बढीरहेको बताउँदै संस्थामा आवद्ध सदस्यको क्षमता एवम् सिप अभिबृद्धिका लागि महिला सशक्तिकरण तथा व्यवसायिक क्षमता अभिबृद्धि तालिम गर्ने बताउनुभयो । विभिन्न आरोह अवरोहकाबीच संस्था अघि बढेको बताउँदै उहाँले पर्यटन व्यवसायमा आवद्ध महिलाको उद्यमशिलता अभिबृद्धि गर्ने बताउनुभयो ।
पोखरा पर्यटन परिषद्का अध्यक्ष गोपिबहादुर भट्टराईले आर्थिक व्यवस्थापन नहुँदासम्म व्यवसाय राम्रो हुन नसक्ने बताउँदै कोरोना प्रभावित व्यवसायीलाई सरकारको साथ र सहयोग आवश्यक हुने बताउनुभयो । आन्तरिक पर्यटनको पुर्नरुत्थान अहिलेको आवश्यकता भएको बताउँदै उहाँले सरकारका नीति नियम पर्यटन व्यवसाय मैत्री हुनुपर्नेमा जोड दिनुभयो ।
पोखरा पर्यटन परिषद्का पूर्व अध्यक्ष एवम् नेपाल पर्यटन बोर्डका पूर्व सदस्य टीकाराम सापकोटाले कोरोना प्रभावित व्यवसायीका लागि तीनवटै सरकारले अघि सारेका राहत प्याकेज लक्षित बर्गसम्म पुग्नुपर्नेमा जोड दिनुभयो ।
कार्यक्रममा पोखरा महानगरपालिका वडा नं ६ का वडा अध्यक्ष जगत पहारी, नाट्टा गण्डकी प्रदेशका अध्यक्ष सञ्जयकान्त सिग्देल, टान पश्चिमाञ्चल क्षेत्रीय संघका प्रथम उपाध्यक्ष धर्मराज पन्थी, हान पश्चिमाञ्चल क्षेत्रीय संघका अध्यक्ष लक्ष्मण सुवेदी, संघका महासचिव शोभा न्यौपाने पाण्डे, संघका उपाध्यक्ष एवम् कार्यक्रम संयोजक कमला गिरी लगायतले पर्यटन व्यवसायी महिला संघका गतिविधिबारे प्रकाश पार्नुभएको थियो ।
प्रतिक्रिया लेख्नुहोस्:-